ৰাজ্যত দৈনিক সংঘটিত হ’বলৈ ধৰিছে ধৰ্ষণৰ ঘটনা। মহিলাৰ সুৰক্ষা যেন ব্যৰ্থ হৈছে ৰাজ্যৰ গৃহ বিভাগ। যাৰ বাবে ৰাজ্যত বৃদ্ধি পাই আহিছে নাৰীজনিত অপৰাধ। আজি পুনৰ দলবদ্ধ ধৰ্ষণৰ বলি হ’ল এগৰাকী ৩৮ বৰ্ষীয় মহিলা। বকোৰ সোণতলীত চাৰি পাষণ্ডই মিলি ধৰ্ষণ কৰিলে মহিলা গৰাকীক ৷
টকা ধাৰলৈ দিয়াৰ প্ৰলোভন দি মহিলাক গৰাকীক পথাৰলৈ মাতি নি ধৰ্ষণ কৰাৰ অভিযোগ উঠিছে। ঘটনা সন্দৰ্ভত হবিবুৰ ৰহমান নামৰ লোক এজনক ইতিমধ্যে আটক কৰিছে আৰক্ষীয়ে।
অভিযোগ অনুসৰি বকোৰ সোনতলীৰ জাওকাটাদিয়াত সংঘটিত হৈছে এই ঘটনা। গাঁওখনৰ আব্দুল মান্নান, সমচেৰ আলী আৰু মজিৰ আলী নামৰ তিনি পাষণ্ডই প্ৰথমে মহিলাগৰাকীক মাতি নি ধৰ্ষণ কৰে। তাৰ পিছতে একে গাঁৱৰে হবিবুৰ ৰহমানে ঘৰলৈ লৈ যায় কিন্তু হবিবুৰেও মহিলাগৰাকীক ধৰ্ষণ কৰে। পিছত উপায়হীন মহিলাগৰাকীয়ে সোনতলী আৰক্ষী চকীত এখন এজাহাৰ দাখিল কৰে আৰু সোনতলী আৰক্ষীয়ে এজাহাৰৰ ভিত্তিত হবিবুৰ ৰহমানক আটক কৰে। কিন্তু অভিযুক্ত আব্দুল মান্নান, মজিৰ আলী আৰু সমচেৰ আলী বৰ্তমান পলাতক অৱস্থাত আছে। ইতিমধ্যে অভিযুক্ত কেইজনক বিচাৰি আৰক্ষীয়ে তদন্ত আৰম্ভ কৰিছে।
