দেশৰ মুখ্য ন্যায়াধীশক নাগালেণ্ডৰ বাবে পৃথক হাইক’ৰ্ট স্থাপনৰ অনুৰোধ নাগালেণ্ডৰ মুখ্যমন্ত্ৰীৰ

নাগালেণ্ডৰ মুখ্যমন্ত্ৰী নেফিঅ’ ৰিঅ’ৰ দেশৰ মুখ্য ন্যায়াধীশৰে সাক্ষাৎ। মঙ্গলবাৰে সাক্ষাৎকালত মুখ্যমন্ত্ৰী গৰাকীয়ে নাগালেণ্ডৰ বাবে পৃথক হাইক’ৰ্ট স্থাপনৰ বাবে দেশৰ মুখ্য ন্যায়াধীশক অনুৰোধ কৰিলে।

শেহতীয়াকৈ উচ্চতম ন্যায়ালয়ৰ মুখ্য ন্যায়াধীশ এন ভি ৰামনাক দিল্লীত সাক্ষাৎ কৰে নাগালেণ্ডৰ মুখ্যমন্ত্ৰীয়ে। মঙ্গলবাৰে সাক্ষাৎকালত নাগালেণ্ডবাসীৰ বাবে পৃথক উচ্চ ন্যায়ালয় স্থাপনত সমৰ্থন ব্যক্ত কৰে দেশৰ মুখ্য ন্যায়াধীশ গৰাকীয়ে। তাৰ পিছতে এই কথা টুইটেৰে প্ৰকাশ কৰে মুখ্যমন্ত্ৰী নেফিঅ’ ৰিঅ’য়ে।

উল্লেখ্য যে,নাগালেণ্ডত নিজস্ব উচ্চ ন্যায়ালয়ৰ অনুপস্থিতিত গুৱাহাটী উচ্চ ন্যায়ালয়ৰ কহিমা বেঞ্চে চলাই আহিছে সম্পূৰ্ণ ন্যায়িক প্ৰক্ৰিয়া। এনেক্ষেত্ৰত নাগালেণ্ডৰ ৰাইজৰ বাবে নিজ ৰাজ্যত পৃথক উচ্চ ন্যায়ালয় থকাটো নিতান্তই প্ৰয়োজনীয়।