Spotlight Northeast
14 May,2021* 17:40 IST* 2 MIN READ
তিনিচুকীয়া জিলাৰ ডিগবৈৰ টিংৰাই বজাৰত শুক্ৰবাৰে আবেলি সংঘটিত হ’ল গ্ৰেণেড বিস্ফোৰণৰ ঘটনা। পুৰণমাল আগৰৱালা নামৰ এগৰাকী ব্যক্তিৰ হাৰ্ডৱেৰ দোকানৰ সন্মুখত বাইকত অহা দুগৰাকী অচিনাক্ত ব্যক্তিয়ে গ্ৰেণেড দলিয়াই থৈ যোৱাৰ ফলত বিস্ফোৰণ সংঘটিত হৈ সঞ্জীত সিং পানীখোৱা নামৰ এগৰাকী ২৫ বছৰীয়া যুৱক নিহত হোৱাৰ লগতে আন তিনিগৰাকী লোক গুৰুতৰ ভাৱে আঘাতপ্ৰাপ্ত হৈছে। মৃত ব্যক্তি জনৰ ঘৰ টিংৰাইৰ শুকান পুখুৰীত বুলি জানিব পৰা গৈছে। আহত কেইগৰাকী ক্ৰমে সুৰজিৎ তালুকদাৰ,মনজিৎ দাসৰ ঘৰ টিংৰাই বজাৰত হোৱাৰ বিপৰীতে ঘনশ্যাম আগৰৱালাৰ ঘৰ বগাপানীত।
বিস্ফোৰণ সংঘটিত হোৱাৰ পিছতে ঘটনাস্থলীত আৰক্ষী
উপস্থিত হৈ তদন্ত প্ৰক্ৰিয়া আৰম্ভ কৰিছে। তিনিচুকীয়া জিলাৰ আৰক্ষী অধীক্ষক গৰাকীয়ে শীঘ্ৰে অপৰাধীক কৰায়ত্ত কৰা কথা উল্লেখ কৰে।
প্ৰত্যক্ষদৰ্শীয়ে জনোৱা অনুসৰি ঘটনা সংঘটিত হোৱা স্থানত এক প্ৰকাণ্ড শব্দ শুনাৰ পাছতে ৰাইজৰ মাজত হুৱাদুৱাৰ সৃষ্টি হয়।
তাৰ পিছত স্থানীয় ৰাইজৰ সহায়ত আহত কেইগৰাকীক এখন মিনিট্ৰাকৰ জৰিয়তে ততাতৈয়াকৈ ডিগবৈ চিভিল হাস্পতালত ভৰ্তি কৰোৱা হয় যদিও পৰৱৰ্তী সময়ত উন্নত চিকিৎসাৰ বাবে ডিব্ৰুগড় অসম মেডিকেল কলেজ হাস্পতাললৈ প্ৰেৰণ কৰে।
এতিয়ালৈ প্ৰকৃততে কোনে এই গ্ৰেণেড বিস্ফোৰণৰ ঘটনাৰ সৈতে জড়িত সেয়া এইমূহূৰ্তলৈ জানিব পৰা হোৱা নাই।
